Jadu Kaise Hota Hai?
Jadu aik Farsi zaban ka lafz hai jiske maani hain: mantra, tona, amal jis ka asar to ho lekin wajah samajh mein na aaye, koi ajeeb baat jo khilaf-e-aqal ho; shobda baazi ya herat mein daal dene wala khel ya kartab. Quran mein jo “Sehr” ka zikr hai wo Shaitani Sehr hai, lekin yahan hum us par baat nahi kar rahe. Hamara maqsad yahan us jadu, mantra, tona aur amliyat par baat karna hai jo aaj bhi hamare muashray mein raaij hai.
Yeh jadu aaj se nahi, balkay qisson kahaniyon, tareekhi riwayaat aur amliyat ki kitabon se nikal kar insano ne apne yaqeen aur khayalat ki energy se isay ek haqeeqat bana diya hai. Aaj bhi log is sawal mein uljhay huay hain ke “Jadu kaise hota hai?”, “Isay karnay ka tareeqa kya hai?”
Toh chaliye, aaj ki post mein hum isi mozu par tafseel se baat karte hain.
Insani Yaqeen Aur Energy Ka Asar
Sabse pehle yeh samajh lein ke insaan ke yaqeen, khayalat aur awaaz mein energy hoti hai. Yeh energy uski zindagi aur uske gird-o-nawaah ke mahaul par asar انداز karti hai.
Is se pehle bhi hum aik mukammal post mein Quran aur Science ke hawalay se yeh sabit kar chukay hain. Us post ka link niche section mein diya gaya hai. Aap sab se guzarish hai ke usay zaroor dekhein.
Kala Jadu Kya Waqai Taqatwar Hai? Asal Haqiqat Jaanein
Jadu Asar Kaise Karta Hai?
Jadu mein zyada tar mantra (wazifay), taweez, mitti ka putla, moorti, haddi, khopdi waghera ka istemal hota hai. Yeh tamam cheezen bejaan aur be-asar hoti hain — jab tak ke inhein insani yaqeen, soch aur la-sha’oori energy na mil jaye.
Misal ke tor par, mantra ke alfaaz sirf lafz hi hote hain. Jab tak aap inhein apni zuban se ada nahi karte, aur apne subconscious mind mein mojood yaqeen aur tasawurat ki energy in mein nahi daalte, yeh alfaaz be-asar rehte hain.
Isi tarah se mitti ka putla, moorti, haddi, khopdi waghera bhi sirf zariye (mediums) hote hain. Inka asli kaam aapke andar mojood manfi energy ko bahar laana hota hai. Yeh mediums aapke subconscious mind ke purane tasawurat aur yaqeen se taluq rakhte hain — jinka aapko bachpan se yaqeen dilaya gaya hota hai.
Jadu Ki Asal Science Kya Hai?
Ab aapko humne jadu ke asar karne ke peechay ki science samjha di hai. Aam jadoogar ko is science ka ilm ho ya na ho, lekin asal mein kaam yahi energy ka hota hai.
Jadoogar kaise banta hai?
Woh sabse pehle apne nafs, iraday aur attention par qaboo paata hai. Woh mashq, yaksoyi, aur irtikaaz ke zariye apne la-sha’oori mind ko control karta hai. Jab yeh kaam bar-bar salo’n tak kiya jaye, to yeh energy mazid barhti hai. Us energy ko woh “jin”, “shaitan” ka naam deta hai — jab ke asal mein yeh manfi energy hoti hai jo uske apne subconscious mind ne paida ki hoti hai.
Kya Har Koi Jadoogar Ban Sakta Hai?
Aapke zehan mein yeh sawal zaroor aayega ke “Kya har shakhs jadu kar sakta hai?” Jawab hai haan. Har woh shakhs jiske subconscious mind mein bachpan se jadu, jin, shaitan ke tasawurat aur manfi yaqeen mojood ho, woh mantra, taweez, moorti waghera ke zariye in manfi energies ko barha sakta hai aur use kar sakta hai.
Lekin! Yeh karne ke liye usay apne nafs par control aur mashq chahiye hoti hai. Yeh mashq kuch is tarah ki hoti hai:
- Mushq Nuqta Beeni
- Mushq Habs-e-Dam
- Mushq Shama Beeni
- Mushq Aaina Beeni
- Mushq Sooraj Beeni
In mashqon ke zariye woh yaqeen, yaksoyi aur energy hasil karta hai jise jadu mein istemal karta hai.
Kya Jadu Nuksan Pahucha Sakta Hai?
Jee bilkul! Ye manfi energies aapke la-sha’oori zehan se taluq rakhti hain. Aur jaise hum pehle bhi bata chukay hain — agar aapke khayalat aur yaqeen manfi hain to unka asar sirf aap tak mehdoood nahi rehta, balkay aapke jism, doosron, aur ird gird ke mahaul par bhi hota hai.
Jadu ki asliyat sirf lafzon, amliyat aur moorti mein nahi balkay aapke andar mojood energy aur yaqeen mein hoti hai.
Nateeja (Conclusion)
Kala Jadu ya Jadu sirf ek zahiri amal nahi, balkay yeh aik psychological aur energetic process hai. Yeh insan ke yaqeen, la-sha’oor aur mashq se taluq rakhta hai. Jadoogar woh hota hai jo apne subconscious mind ki manfi energy ko samajh kar, usay taqat mein badal kar, doosron par asar انداز karta hai.
Magar yaad rahe — yeh energy aakhir mein jadoogar ko hi sabse zyada nuksan pohchati hai. Is liye hamesha positive energy, rohaniyat aur Quran o Hadith ki roshni mein zindagi guzarni chahiye.
Leave a Reply